म. टा. विशेष प्रतिनिधी, मुंबई/ बीड : अधिवेशनाच्या एक दिवस आधी मंत्रिमंडळाचा विस्तार आणि अधिवेशनाच्या शेवटच्या दिवशी खात्याचे वाटप करण्यात आले असले तरी अजूनही पालकमंत्रिपदाचे वाटप करण्यात आलेले नाही. त्यात संतोष देशमुख यांच्या हत्येनंतर बीडचे पालकमंत्रिपदही चांगलेच चर्चेत आले आहे. मागील सरकारमध्ये धनंजय मुंडे बीडचे पालकमंत्री होते. मात्र या वेळी पालकमंत्री कोण होणार, याकडे लक्ष आहे.
विरोधकांकडून धनंजय मुंडे यांच्यावर सातत्याने आरोप होत असल्याने ते पुन्हा पालकमंत्री होणार का हे पाहणे औत्सुक्याचे ठरणार आहे. अशावेळी बीडच्या पालकमंत्रिपदाबाबत बोलताना मुख्यमंत्री देवेंद्र फडणीस यांनी महत्वाचे व्यक्तव्य केले आहे. ‘बीडचा पालकमंत्री कोण असणार, याबाबतचा निर्णय मी, अजित पवार आणि एकनाथ शिंदे मिळून घेऊ. बीडमध्ये कोणाची दादागिरी चालू देणार नाही,’ असे फडणवीस यांनी म्हटले आहे.
सरपंच संतोष देशमुख हत्या प्रकरणाच्या पार्श्वभूमीवर, मंत्री धनंजय मुंडे यांच्या राजीनाम्याबाबत उलटसुलट चर्चा सुरू असताना महायुतीच्या नेत्यांकडूनही शुक्रवारी सूचक विधान करण्यात आले. धनंजय मुंडे यांच्या राजीनाम्याबाबत पक्षश्रेष्ठी निर्णय घेतील, असे विधान नेत्यांकडून करण्यात आले आहे.बीड जिल्ह्यातील केज तालुक्यातील मस्साजोगचे सरपंच संतोष देशमुख यांचे अपहरण करण्यात आले होते. त्यानंतर त्यांची हत्या करण्यात आली. या घटनेने राज्यभरात खळबळ उडाली. संतोष देशमुख हत्या प्रकरणानंतर आता महाराष्ट्रात वातावरण चांगलेच तापले आहे. देशमुख यांच्या हत्येनंतर आरोप-प्रत्यारोप सुरू असल्याचे पाहायला मिळत आहे.दरम्यान या प्रकरणानंतर विरोधकांकडून सातत्याने मंत्री धनंजय मुंडे यांच्या कोंडीचा प्रयत्न सुरू आहे. त्यांच्या राजीनाम्याची मागणीही करण्यात येत आहे. त्यावर महायुतीच्या नेत्यांकडून सूचक प्रतिक्रिया देण्यात आली आहे. ‘धनंजय मुंडे यांच्याबाबत पक्षश्रेष्ठी निर्णय घेतील. यावर आम्ही भाष्य करणे योग्य नाही,’ असे गिरीश महाजन यांनी म्हटले आहे. तर राष्ट्रवादी काँग्रेस पक्षाचे नेते आणि मंत्री हसन मुश्रीफ यांनीही अशीच प्रतिक्रिया दिली आहे. धनंजय मुंडे यांच्याबाबत पक्षश्रेष्ठी निर्णय घेतील, असे मुश्रीफ यांनी म्हटले आहे. त्यामुळे आता यावरून चर्चेला उधाण आले आहे.
‘बीडमधील घटनांमुळे तणाव’
‘बीडमध्ये ज्या घटना घडत आहेत त्यामुळे जातीय तणाव वाढतो. त्यामुळे या घटना गांभीर्याने घ्यायला हव्यात. अशा ठिकाणी कायदा-सुव्यवस्था राखण्यासाठी चांगल्या अधिकाऱ्यांची गरज आहे,’ असे मत सामाजिक न्यायमंत्री संजय शिरसाट यांनी शुक्रवारी व्यक्त केले. ‘बीडच्या घटनेकडे राजकीय दृष्टीने पाहू नका. धनंजय मुंडे, सुरेश धस यांची नावे जोडू नका. या घटनेला राजकीय वळण देता कामा नये,’ असेही मत त्यांनी व्यक्त केले.
मुख्यमंत्री फडणवीसांच्या भेटीनंतर धनंजय मुंडे स्व. सरपंच संतोष देशमुख प्रकरणावर काय म्हणाले?
प्रसारमाध्यमांशी बोलताना त्यांनी हे मत व्यक्त केले. ‘कोणतीही घटना घडल्यानंतर संबंधित ठिकाणचे अधिकारी माझ्या ओळखीचे आहेत, त्यातून मी सुटेन, असे गुन्ह्यातील आरोप सांगतात. त्यामुळे येथे चांगले अधिकारी असणे गरजेचे आहे. अनेक माफिया, गुंड, वाळूमाफिया हे तिथे आहेत. त्यांची एक साखळीच तयार झालेली आहे. माझ्या दौऱ्यातही या गोष्टी समोर आल्या आहेत. त्यामुळे यावर योग्य वेळी कारवाई होणे गरजेचे आहे. यात काही मुले पकडली जातात, मात्र; ही मुले २४ वर्षांच्या आतील आहेत,’ याकडेही शिरसाट यांनी लक्ष वेधले.
‘एखाद्याला पिस्तुलाचा परवाना देताना त्याची चौकशी होते का? आढावा घेऊन अशा चुकीच्या व्यक्तींना दिलेले परवाने रद्द केले पाहिजेत. कारवाई झाली पाहिजे असेही,’ ते म्हणाले.
Author: VS NEWS DESK
pradeep blr
