ఏ జ‌ట్టుకు సాధ్యం కాలేదు.. న్యూజిలాండ్ మాత్రం చరిత్ర సృష్టించింది..!

టెస్ట్ క్రికెట్ చరిత్రలో భారత గడ్డపై మరే ఇతర జట్టుకు సాధ్యం కాని రికార్డును న్యూజిలాండ్ క్రియేట్‌ చేసింది. ముంబైలోని వాంఖడే స్టేడియంలో జరిగిన మూడో టెస్టు మ్యాచ్‌లో న్యూజిలాండ్ 25 పరుగుల తేడాతో ఆతిథ్య టీమిండియాను ఓడించి మూడు టెస్టుల సిరీస్‌ను 3-0తో కైవసం చేసుకుంది. ఇప్పటి వరకు ఏ జట్టు కూడా మూడు లేదా అంతకంటే ఎక్కువ టెస్టు మ్యాచ్‌ల సిరీస్‌లో టీమ్‌ఇండియాను క్లీన్‌స్వీప్ చేయలేకపోయింది. అయితే టామ్ లాథమ్ సారథ్యంలోని న్యూజిలాండ్ జట్టు ఈ ఘనత సాధించింది.

బెంగళూరు, పుణేలో జరిగిన రెండు టెస్టుల్లోనూ న్యూజిలాండ్ విజయం సాధించి ఇప్ప‌టికే సిరీస్‌ను కైవసం చేసుకుంది. మూడో మ్యాచ్‌లో భారత్ తన పరువును కాపాడుకునే ప్రయత్నం చేస్తుంద‌ని భావించారు.. కానీ 121 పరుగులకే కుప్పకూలింది. మూడో టెస్టులో గెలవాలంటే భారత్‌కు 147 పరుగులు అవసరం.. ఈ స్కోర్ చేయడానికి మూడు రోజుల సమయం ఉంది. అయినా ఆ స్కోర్ చేయలేకపోయింది. మూడో రోజైన ఆదివారం రెండో సెషన్‌లో ఆలౌట్ అయిన భారత జట్టు మ్యాచ్‌తో పాటు సిరీస్‌ను కోల్పోయింది.

ఈ మొత్తం సిరీస్‌లో భారత బ్యాట్స్‌మెన్‌లు నిరాశపరిచారు. కెప్టెన్ రోహిత్ శర్మ, వెటరన్ బ్యాట్స్‌మెన్ విరాట్ కోహ్లీ ఇద్ద‌రూ విఫ‌ల‌మ‌య్యారు. ఈ సిరీస్‌లో భారత్ తరఫున అత్యధిక పరుగులు చేసిన టాప్-2 బ్యాట్స్‌మెన్ రిషబ్ పంత్, యశస్వి జైస్వాల్ కాస్త ఆక‌ట్టుకున్నారు. తొలి ఇన్నింగ్సులో ఐదు, రెండో ఇన్నింగ్సులో ఆరు వికెట్లు ప‌డ‌గొట్టి అజాజ్ ప‌టేల్ టీమిండియా న‌డ్డి విరిచాడు.

న్యూజిలాండ్ జట్టు 9 వికెట్ల నష్టానికి 171 పరుగులతో రోజు ఆట ప్రారంభించింది. ఇజాజ్‌ను అవుట్ చేయడం ద్వారా జడేజా న్యూజిలాండ్ ఇన్నింగ్స్‌ను ముగించాడు. ఈ మ్యాచ్‌లో రెండు ఇన్నింగ్స్‌ల్లోనూ జడేజా ఐదు వికెట్లు తీశాడు. జడేజా టెస్టుల్లో రెండు ఇన్నింగ్స్‌ల్లోనూ ఐదు వికెట్లు తీయడం ఇదే తొలిసారి. న్యూజిలాండ్ తరఫున ఈ ఇన్నింగ్స్‌లో విల్ యంగ్ అత్యధికంగా 51 పరుగులు చేశాడు. ఫిలిప్స్ 26, డెవాన్ కాన్వే 22, డారిల్ మిచెల్ 21 పరుగులు చేశారు.

న్యూజిలాండ్ తొలి ఇన్నింగ్స్‌లో 235 పరుగులు చేసింది. భారత జట్టు తన తొలి ఇన్నింగ్స్‌లో 263 పరుగులకు ఆలౌటైంది. ఈ ఇన్నింగ్స్‌లో భారత్ తరఫున గిల్ అత్యధికంగా 90 పరుగులు చేశాడు. పంత్ తొలి ఇన్నింగ్స్‌లో 60, 64 పరుగులతో రాణించాడు. అయినా ఓట‌మిని త‌ప్పించ‌లేక‌పోయారు.