KTR Speech: జైలుకు పంపితే, యోగా చేస్తా.. కాంగ్రెస్‌ ప్రభుత్వంపై కేటీఆర్ సెటైర్లు!

“55 కోట్లు ఫార్ములా వన్ రేసింగ్ కోసం ఆ కంపెనీకి ఇవ్వమని చెప్పింది నేనే. అప్పుడు మున్సిపల్ శాఖ మంత్రిగా నాకున్న అధికారంతో ఇప్పించాను. హైదరాబాద్ బ్రాండ్ ఇమేజ్ కోసం ఆ డబ్బుల్ని చెల్లించాం. అధికారంలోకి వచ్చిన కాంగ్రెస్ ప్రభుత్వం ఫార్ములా ఈ రేసింగ్‌ని రద్దు చేయడంతో ప్రభుత్వానికి భారీగా నష్టం వచ్చింది. కేసులు నాపై కాదు, ఇప్పుడున్న ప్రభుత్వంపై పెట్టాలి. నాపై ఏం కేసులు పెడతారు? కేసులకు భయపడేది లేదు. జైలుకు పంపిస్తే రోజూ యోగా చేసి మరింత ఫిట్‌గా తయారవుతాను. జైల్లో ఫిట్‌నెస్ పెంచుకొని బయటకు వచ్చి పాదయాత్ర చేస్తాను” అని కేటీఆర్ తెలిపారు.

“మోటార్ కార్ల రేసింగ్ అనేది ఒక క్రీడ‌. క‌బ‌డ్డీ, ఖోఖో, క్రికెట్ లాగానే మోటార్ రేసింగ్ కూడా వరల్డ్ వైడ్ ఫేమస్. ప్రపంచంలో తొలిసారి 1894లో కార్ల రేసింగ్ పారిస్‌లో జ‌రిగింది. ఫార్ములా -1 మొద‌టి రేస్ 1946లో తొలిసారిగా ఇట‌లీలో జ‌రిగింది. ఎఫ్-1 రేస్‌ను ప్రతి సంవత్సరం వరల్డ్ వైడ్ నిర్వహిస్తారు. ఈ రేస్ నిర్వహించడానికి ప్రపంచ‌ దేశాలు పోటీ ప‌డతాయి. ఇండియాకి ఫార్ములా -1 రావాల‌నే క‌ల ఇప్పటిది కాదు. రేవంత్ రెడ్డి గురువు చంద్రబాబు 28 సెప్టెంబ‌ర్ 2003లో అప్పటి ఎఫ్‌-1 సీఈవోను క‌లిసి రంగారెడ్డి జిల్లాలో ఫార్ములా 1 పెట్టాల‌ని కోరారు. ఆ కలను మేము నెర‌వేర్చాం. ఫార్ములా-1 జరగడానికి గోప‌న్‌ప‌ల్లి ప్రాంతంలో 1500 ఎక‌రాలు సేక‌రించాల‌ని చంద్రబాబు నిర్ణయించారు. 400 ఎక‌రాల‌కు ట్రాక్ నిర్మించాల‌నుకున్నారు. ఆ 400 ఎక‌రాల్లో రేవంత్ రెడ్డి భూమి ఉంది. భూసేక‌ర‌ణ‌కు నోటిఫికేష‌న్ ఇచ్చారు. భూములు ఇచ్చేది లేదని రైతులు కోర్టుకెళ్లారు. ఆ కేసు ఇంకా న‌డుస్తోంది” అని కేటీఆర్ తెలిపారు.