ନୂଆଦିଲ୍ଲୀ,୨୯।୧୧: ୨୧୧ ଭାରତୀୟ ମତ୍ସ୍ୟଜୀବୀ ପାକିସ୍ତାନର ଜେଲରେ ବନ୍ଦୀ ଅଛନ୍ତି। ଭାରତ ସରକାର ସଂସଦରେ ଏହି ସୂଚନା ଦେଇଛନ୍ତି। ଏହି ୨୧୧ ମତ୍ସ୍ୟଜୀବୀଙ୍କ ମଧ୍ୟରୁ ୧୩୯ଜଣ କେବଳ ଗୁଜୁରାଟର ବାସିନ୍ଦା।
କଂଗ୍ରେସ ଏମପି ଶକ୍ତି ସିଂ ଗୋହିଲ ଏହି ପ୍ରସଙ୍ଗ ଗୃହରେ ଉଠାଇଥିଲେ। ପାକିସ୍ତାନ ଦ୍ୱାରା ଲଗାଯାଇଥିବା ଯୋଗାଯୋଗ ବ୍ଲାକଆଉଟ ଦ୍ୱାରା ପ୍ରଭାବିତ ମତ୍ସ୍ୟଜୀବୀ ଏବଂ ସେମାନଙ୍କ ପରିବାରର କଲ୍ୟାଣ ପାଇଁ ସେ ଚିନ୍ତା ପ୍ରକଟ କରିଥିଲେ।
ଗୋହିଲ କହିଛନ୍ତି ଯେ ୟୁପିଏ ଶାସନ ସମୟରେ ପରିବାରମାନେ ଡାକ ଚିଠି ମାଧ୍ୟମରେ ସେହି ମତ୍ସ୍ୟଜୀବୀଙ୍କ ମଙ୍ଗଳ ବିଷୟରେ ସୂଚନା ପାଇଥା’ନ୍ତି। ବର୍ତ୍ତମାନ ଏହା ବନ୍ଦ ହୋଇଯାଇଛି । ପାକିସ୍ତାନ ଏହି ଯୋଗାଯୋଗ ସୁବିଧା ବନ୍ଦ କରିଦେଇଛି। ଏହି ମତ୍ସଜୀବୀଙ୍କ ପରିବାର ବର୍ତ୍ତମାନ ସେମାନଙ୍କ ପ୍ରିୟଜନଙ୍କ ଅବସ୍ଥା ଜାଣିବାର କୌଣସି ମାଧ୍ୟମ ନ ଥିବାରୁ ଗୋହିଲ ଏହି ପରିସ୍ଥିତିକୁ ମାନବିକ ଅଧିକାରର ଉଲ୍ଲଂଘନ ବୋଲି କହିଛନ୍ତି।
ଗୋହିଲ କହିଛନ୍ତି ଯେ ମତ୍ସ୍ୟଜୀବୀଙ୍କ ଅସୁବିଧାକୁ ଦୂର କରିବା ପାଇଁ ତତ୍ପରତା ନାହିଁ। ଭାରତ ସରକାର ଏହି ମାମଲାକୁ ତ୍ୱରାନ୍ବିତ କରିବା ପାଇଁ ଗୋହିଲ ଦାବି କରିଛନ୍ତି। ମତ୍ସ୍ୟଜୀବୀମାନଙ୍କୁ ଶୀଘ୍ର ମୁକ୍ତ କରିବା ପାଇଁ ଆଲୋଚନା ହେବାକୁ ପଡ଼ିବ, ଯେଉଁଥିପାଇଁ ଏକ ସ୍ବତନ୍ତ୍ର ଆଇନ ପରାମର୍ଶଦାତା ନିଯୁକ୍ତ ହେବା ଉଚିତ୍। ସରକାର ତୁରନ୍ତ କୂଟନୈତିକ ପଦକ୍ଷେପ ନେବା ଉଚିତ ବୋଲି ଗୋହିଲ ଦାବି କରିଛନ୍ତି, ଯାହାଫଳରେ ଭବିଷ୍ୟତରେ ଯଦି କୌଣସି ମତ୍ସ୍ୟଜୀବୀ ପାକିସ୍ତାନରେ ଅଟକି ଯାଆନ୍ତି, ତେବେ ସେମାନଙ୍କୁ ସହାୟତା ଯୋଗାଇ ଦିଆଯାଇ ଶୀଘ୍ର ଘରକୁ ଆଣି ପାରିବେ। ଗୋହିଲ ଜୋର ଦେଇଛନ୍ତି ଯେ ବର୍ତ୍ତମାନର ପରିସ୍ଥିତିରେ କେବଳ ମତ୍ସ୍ୟଜୀବୀମାନେ ଅସୁବିଧାରେ ପଡ଼ନ୍ତି ନାହିଁ, ବରଂ ସେମାନଙ୍କ ପରିବାର ମଧ୍ୟ ଟେନସନରେ ରହିଛନ୍ତି।
Author: VS NEWS DESK
pradeep blr
