അദാനി പവർ കമ്പനിയായ മഹാൻ എനർജൻ ലിമിറ്റഡിൻ്റെ 26 ശതമാനം ഓഹരികൾ ഏറ്റെടുത്ത് റിലയൻസ്. റിലയൻസിൻ്റെ ബിസിനസിന് ഊർജ വിതരണം ഉറപ്പാക്കുന്നതാണ് ഡീൽ. അദാനി പവർ ഓഹരികളിൽ ഇന്ന് മുന്നേറ്റം. ഉച്ചയോടെ രണ്ടു ശതമാനം ഉയർന്ന് 505.95 രൂപയിലാണ് അദാനി പവർ ഓഹരി വില. 52 ആഴ്ചയിലെ ഉയർന്ന വില 895.85 രൂപയാണ്. താഴ്ന്ന വില 432 രൂപയുംമുകേഷ് അംബാനി ഗൗതം അദാനിയുമായി ഒരു കരാർ ഒപ്പിട്ടിരിക്കുകയാണ്. 50 കോടി രൂപയുടേതാണ് കരാർ. അദാനി പവറിൻ്റെ കീഴിലുള്ള മഹാൻ എനർജൻ ലിമിറ്റഡിൻ്റെ 26 ശതമാനം ഓഹരികൾ ഇനി റിലയൻസ് ഇൻഡസ്ട്രീസിന് സ്വന്തമാകും. കോർപ്പറേറ്റ് രംഗത്തെ ഏറ്റവും പ്രധാന ഡീലുകളിൽ ഒന്നാണിത്. കരാർ പൂർത്തിയാകുന്നതോടെ റിലയൻസ് ഇൻഡസട്രീസിന് 500 മെഗാവാട്ട് വൈദ്യുതി ഉപയോഗിക്കാനാകും. മഹാൻ എനർജൻ്റെ മധ്യപ്രദേശ് ആസ്ഥാനമായുള്ള പവർ പ്ലാൻ്റ് ഉത്പാദിപ്പിക്കുന്ന വൈദ്യുതിയാണ് ഇനി റിലയൻസിനും ഉപയോഗിക്കാനാകുക.
മഹാൻ എനർജൻ്റെ അഞ്ചു കോടി ഓഹരികളാണ് റിലയൻസ് വാങ്ങുക. ഓരോന്നിനും 10 രൂപയായിരിക്കും മുഖവില. 50 കോടി രൂപയാണ് നിക്ഷേപം. 2005 ലെ വൈദ്യുതി നിയമ പ്രകാരം സ്വന്തം ഉപയോഗത്തിനായി അനുവദിച്ചിരിക്കുന്ന പരിധിയിൽ കൂടുതൽ വൈദ്യുതി വേണ്ടി വരുന്ന കമ്പനികൾ ഒരു ഊർജ കമ്പനിയിൽ കുറഞ്ഞത് 26 ശതമാനം ഓഹരികൾ വാങ്ങിയിരിക്കണമെന്ന് വ്യവസ്ഥയുണ്ട്.20 വർഷത്തെ കരാറാണ് അദാനി പവറുമായി റിലയൻസ് ഒപ്പിടുന്നത്. ഈ കാലയളവിൽ അദാനി പവറൽ നിന്നുള്ള ദീർഘകാല വൈദ്യുതി വിതരണം കമ്പനി ലക്ഷ്യമിടുന്നു. ഗുജറാത്തിലെയും മഹാരാഷ്ട്രയിലെയും റിലയൻസിൻ്റെ പെട്രോകെമിക്കൽ, റിഫൈനിംഗ് കോംപ്ലക്സുകൾക്ക് പുതിയ കരാർ നേട്ടമാകുമെന്നാണ് വിലയിരുത്തൽ.
ഇന്ത്യയിലെ ഏറ്റവും സ്വാധീനമുള്ള വ്യവസായികളാണ് മുകേഷ് അംബാനിയും ഗൗതം അദാനിയും. ഒരുമിച്ചുള്ള ബിസിനസ് സഹകരണവും കരാറുകളും ഇരുകൂട്ടർക്കും നേട്ടമാകും. അംബാനിയുടെ സാമ്രാജ്യം എണ്ണ, വാതകം, ടെലികോം, റീട്ടെയിൽ എന്നീ മേഖലകളിൽ വ്യാപിച്ചിരിക്കുമ്പോൾ, അടിസ്ഥാന സൗകര്യങ്ങൾ, തുറമുഖം, പുനരുപയോഗ ഊർജം, പോർട്ട് തുടങ്ങി വിവിധ മേഖലകളിൽ അദാനിയുടെ ബിസിനസ് വ്യാപിച്ചുകിടക്കുന്നു.