ಮಸಾಜ್ ಪಾರ್ಲರ್ ದಾಳಿಗೆ ಹಿಂದೂ ಮಹಾ ಸಭಾ ಬೆಂಬಲ: ಡಾ. ಎಲ್. ಕೆ. ಸುವರ್ಣ

ಮಂಗಳೂರು: ರಾಮ ಸೇನಾ ಕಾರ್ಯಕರ್ತರು ನಡೆಸಿದ ಆಯುರ್ವೇದ ಮಸಾಜ್ ಪಾರ್ಲರ್ ಮೇಲೆ ದಾಳಿ ಹಿಂದೂ ಮಹಾ ಸಭಾ ಕರ್ನಾಟಕ ರಾಜ್ಯ ಘಟಕದ ಅಧ್ಯಕ್ಷರಾದ ಡಾ. ಎಲ್. ಕೆ. ಸುವರ್ಣ ಅವರ ಬೆಂಬಲವನ್ನು ಪಡೆದಿದೆ. ಅವರು ಈ ದಾಳಿಯನ್ನು ನ್ಯಾಯಯುತವೆಂದು ಘೋಷಿಸಿದ್ದು, ಸಮಾಜದ ಸ್ವಾಸ್ತ್ಯ ಕಾಪಾಡುವುದು ಹಾಗೂ ಅನೈತಿಕ ಚಟುವಟಿಕೆಗಳನ್ನು ತಡೆಗಟ್ಟುವುದು ಮುಖ್ಯ ಹೊಣೆಗಾರಿಕೆ ಎಂದು ಹೇಳಿದರು.

“ಅಕ್ರಮಗಳನ್ನು ತಡೆಗಟ್ಟಲು ಸಂಘಟನೆಗಳು ಕ್ರಮ ಕೈಗೊಳ್ಳುವುದನ್ನು ‘ನೈತಿಕ ಪೊಲೀಸ್ ಗಿರಿ‘ ಎಂದು ಕರೆಯುವುದು ತಪ್ಪಾಗಿದೆ. ಇದು ಸಮಾಜದ ಒಳ್ಳೆಯಕಾಯಕವಾಗಿದ್ದು, ಇಂತಹ ಕಾರ್ಯಗಳಿಗೆ ತಪ್ಪುರ್ಥ ನೀಡುವುದು ಬೇಡ,” ಎಂದು ಅವರು ಅಭಿಪ್ರಾಯಪಟ್ಟರು.

ಮಂಗಳೂರು ನಗರದಲ್ಲಿ ಆಯುರ್ವೇದ ಮಸಾಜ್ ಪಾರ್ಲರ್‌ಗಳ ಹೆಸರಿನಲ್ಲಿ ಕೆಲವು ವ್ಯಕ್ತಿಗಳು ಅನೈತಿಕ ಚಟುವಟಿಕೆಗಳನ್ನು ನಡೆಸುತ್ತಿರುವುದು ಪತ್ತೆಯಾಗಿದೆ. ಈ ಬಗ್ಗೆ ಮಾತನಾಡಿದ ಡಾ. ಎಲ್. ಕೆ. ಸುವರ್ಣ, “ಇಂತಹ ಚಟುವಟಿಕೆಗಳು ಪಾರ್ಲರ್ ವೃತ್ತಿಯನ್ನು ಪ್ರಾಮಾಣಿಕವಾಗಿ ಮಾಡುವ ಎಲ್ಲಾ ವ್ಯಕ್ತಿಗಳ ಮೇಲೆ ಕಳಂಕ ತರುತ್ತವೆ,” ಎಂದು ಹೇಳಿದರು.

ಅವರು ಸರ್ಕಾರ ಹಾಗೂ ಪೊಲೀಸ್ ಇಲಾಖೆಗೆ ಕರೆ ನೀಡಿದ್ದು, ಇಂತಹ ಪಾರ್ಲರ್‌ಗಳನ್ನು ಪತ್ತೆ ಹಚ್ಚಿ ತಕ್ಷಣವೇ ಮುಚ್ಚಬೇಕೆಂದು ಒತ್ತಾಯಿಸಿದರು. ಹಿಂದೂ ಮಹಾ ಸಭಾ ಕರ್ನಾಟಕ ರಾಜ್ಯ ಘಟಕ ಇಂತಹ ದುಷ್ಚಟಗಳನ್ನು ನಿರ್ಮೂಲನೆ ಮಾಡುವಲ್ಲಿ ಸಂಪೂರ್ಣ ಬೆಂಬಲ ನೀಡುತ್ತದೆ ಎಂಬುದಾಗಿ ಅವರು ಘೋಷಿಸಿದರು.

ಮಸಾಜ್ ಪಾರ್ಲರ್‌ಗಳಲ್ಲಿ ನಡೆಯುವ ಅವ್ಯವಹಾರಗಳಿಗೆ ಕಡಿವಾಣ ಹಾಕುವುದು ಕೇವಲ ಸಂಘಟನೆಗಳ ಕಾರ್ಯವಲ್ಲ, ಆದರೆ ಇದನ್ನು ಸರಕಾರ ಮತ್ತು ಪೊಲೀಸ್ ಇಲಾಖೆ ಕಠಿಣವಾಗಿ ಎದುರಿಸಬೇಕು. “ಇಂತಹ ದಂಧೆಗಳಲ್ಲಿ ತೊಡಗಿರುವವರನ್ನು ಪತ್ತೆಹಚ್ಚಿ ಕಾನೂನು ಕ್ರಮ ಕೈಗೊಳ್ಳುವುದು ಅಗತ್ಯ,” ಎಂದು ಹಿಂದೂ ಮಹಾ ಸಭಾ ಆಗ್ರಹಿಸಿದೆ.