ମସ୍କୋ,୧୩।୩: ୟୁକ୍ରେନ ସହିତ ଶାନ୍ତି ଚୁକ୍ତିନାମା ପାଇଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରୟାସ ପାଇଁ ରୁଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ୍ ତାଙ୍କୁ ଧନ୍ୟବାଦ ଜଣାଇଛନ୍ତି। ଭ୍ଲାଦିମିର ପୁଟିନ୍ କହିଛନ୍ତି ଯେ ରୁଷିଆ ଅସ୍ତ୍ରବିରତି ପାଇଁ ପ୍ରସ୍ତୁତ। ତଥାପି, ସେ ଅସ୍ତ୍ରବିରତି ସମ୍ପର୍କରେ ଏକ ସର୍ତ୍ତ ମଧ୍ୟ ଲଗାଇଛନ୍ତି। ସେ କହିଛନ୍ତି ଯେ ଆମେ ଅସ୍ତ୍ରବିରତି ପାଇଁ ପ୍ରସ୍ତୁତ, କିନ୍ତୁ ଏହା ଏକ ଦୀର୍ଘକାଳୀନ ଶାନ୍ତି ହେବା ଉଚିତ୍।
ଆମେରିକାର ଜାତୀୟ ସୁରକ୍ଷା ପରାମର୍ଶଦାତା ମାଇକ ୱାଲ୍ଜ ଗୁରୁବାରତାଙ୍କ ରୁଷିଆ ଗସ୍ତରେ ମସ୍କୋରେ ପହଞ୍ଚିଥିଲେ। ଏହି ସମୟରେ ସେ ପୁଟିନ୍ଙ୍କ ବରିଷ୍ଠ ସହାୟକ ୟୁରି ଉଷାକୋଭଙ୍କୁ ଭେଟିଥିଲେ।
ଓ୍ବାଶିଂଟନ,୧୪।୩: ଡୋନାଲ୍ଡ ଟ୍ରମ୍ପ ପ୍ରଶାସନ ଦ୍ୱାରା ଗଣ ଛଟେଇର ସମ୍ମୁଖୀନ ହେଉଥିବା ହଜାର ହଜାର ଫେଡେରାଲ କର୍ମଚାରୀଙ୍କୁ ପୁନଃସ୍ଥାପନ କରିବାକୁ ଆମେରିକାର ଏକ କୋର୍ଟ ନିର୍ଦ୍ଦେଶ ଦେଇଛନ୍ତି। ଏହି ନିର୍ଦ୍ଦେଶ ଛଅଟି ଫେଡେରାଲ ଏଜେନ୍ସିକୁ ଦିଆଯାଇଥିଲା, ଯେଉଁଥିରେ ଟ୍ରେଜେରୀ, ଭେଟେରାନ ବ୍ୟାପାର, କୃଷି, ପ୍ରତିରକ୍ଷା, ଶକ୍ତି ଏବଂ ଗୃହ ବିଭାଗ ଅନ୍ତର୍ଭୁକ୍ତ। ‘ଖରାପ କାର୍ଯ୍ୟଦକ୍ଷତା’ ଆଧାରରେ ଏହି କର୍ମଚାରୀମାନଙ୍କୁ ବହିଷ୍କାର କରାଯାଇଥିଲା, କିନ୍ତୁ କୋର୍ଟ ଏହି କାରଣକୁ କେବଳ ଏକ ପ୍ରହସନ ବୋଲି କହିଥିଲେ।
କର୍ମଚାରୀ ସଂଘ ଦ୍ୱାରା ଦାୟର ଏକ ଆବେଦନର ଶୁଣାଣି କରି ବିଚାରପତି ୱିଲିୟମ ଆଲସୁପ ଏହି ନିଷ୍ପତ୍ତି ଦେଇଛନ୍ତି। ନ୍ୟୁୟର୍କ ଟାଇମ୍ସର ଏକ ରିପୋର୍ଟ ଅନୁଯାୟୀ, ବିଚାରପତି କହିଛନ୍ତି ଯେ ଟ୍ରମ୍ପ ପ୍ରଶାସନ ଖରାପ ପ୍ରଦର୍ଶନ ଆଧାରରେ ବହିଷ୍କାର ହୋଇଥିବା କର୍ମଚାରୀମାନଙ୍କୁ ଭୁଲ ଭାବରେ ହଟାଇ ଦେଇଛି। ସେ କହିଥିଲେ ଯେ ଏହି ଯଥାର୍ଥତା କେବଳ ବୈଧାନିକ ଆବଶ୍ୟକତାକୁ ଏଡାଇବା ପାଇଁ ଏକ ପ୍ରୟାସ ଥିଲା ଏବଂ ଏହା କର୍ମଚାରୀଙ୍କ ପ୍ରକୃତ କାର୍ଯ୍ୟଦକ୍ଷତା ଉପରେ ଆଧାରିତ ନୁହେଁ।
ସାନ ଫ୍ରାନ୍ସିସ୍କୋର ଆମେରିକୀୟ କୋର୍ଟ କହିଛନ୍ତି, ‘ଏହା ଏକ ଦୁଃଖଦ ଦିନ ଯେତେବେଳେ ଆମ ସରକାର ଭଲ କର୍ମଚାରୀଙ୍କୁ ବହିଷ୍କାର କରନ୍ତି ଏବଂ କୁହନ୍ତି ଯେ ଏହା କାର୍ଯ୍ୟଦକ୍ଷତା ଆଧାରରେ କରାଯାଇଥିଲା, ଯେତେବେଳେ ଏହା ଏକ ମିଥ୍ୟା।’ ସେ ଫେଡେରାଲ ଏଜେନ୍ସିଗୁଡ଼ିକୁ ଅନୁପଯୁକ୍ତ ଭାବରେ ବହିଷ୍କାର ହୋଇଥିବା ସମସ୍ତ କର୍ମଚାରୀଙ୍କୁ ପୁନଃସ୍ଥାପିତ କରିବାକୁ ନିର୍ଦ୍ଦେଶ ଦେଇଥିଲେ।
